Матур төш: Ләйлә Дәүләтова Казан ресторанында Максим Галкин белән очрашкан
Шагыйрә бу турыда виртуаль дусларына сөйләгән.
Шагыйрә Ләйлә Дәүләтова матур төш күргән. Ул Казан ресторанында Максим Галкин белән «очрашудан» туган хис-кичерешләре белән виртуаль дуслары белән уртаклашкан.
«Кичә төнлә очраклы гына Казанның иң шәп ресторанында чәй эчәргә туры килде. Шунда ике баласын ияртеп Максим Галкин килеп кермәсенме! Шаккаттым, шатландым, каушадым!
Монда нормаль өстәлләр юк дия-дия безнең зур өстәл янына килеп тә утырды. Әкияттәге кебек инде. Балаларга син йолдыз ни, түгел ни, рәхәтләнеп Гөлмәрьям белән уйный да башладылар. Бик ачык кеше буларак, Максим да сөйләшергә җайлы кеше булып чыкты!
Концертларым турында киңәшергә кирәк дип, Данир Сабиров чакырткан икән! Әйтәм аны, Данирның концертлары шәп була, мондый шәхесләр белән эшләгәч, кәнишне инде! Әле күпме түләгәндер…
Чын журналист буларак, кешенең эчендәге бөтен серен сөйләтә алуымны беләсез! Рәхәтләндек! Кешенең серләрен сөйләргә ярамый. Шуңа күрә язмыйм. Оялам да әле. Алла да Казанда икән! Эх, мин әйтәм, Адәм һәм Һава тапшыруында эшләгән чак булса, супер әйбер ясаган була идем болардан!
Нинди таныш тавыш дип карасам, ишектә Илсөя Бәдретдинова күренде һәм туп-туры безнең өстәлгә килеп тә утырды!
Ооо, яратам шуны. Ну кызый, диде бу, әйберләрен өстәлгә шап итеп ташлап. Менә шул тимерле сумкасы бөтен эшне бозды да куйды. Эх, Илсөя! Аны ипләп кенә ярамыймы? Сезнең дә шулай бер уйламаган кешеләрне төштә күреп, кинәт кенә уянып киткәнегез бармы ул? Эх, мин әйтәм, күпме сөйләшәсе сүз калган иде! Фотога төшәргә дә өлгерми калдык! Сезгә күрсәтеп, мактанган булыр идем», — дип тәмләп язган Ләйлә.
Инстачыларның күпчелеге рәхәтләнеп ышанып укып утырган да, аннары рәхәтләнеп көлгәннәр. Ә шагыйрәнең мондый «шаярулары»ннан хәбәрдар булучылар һич ышанмаган.