«Кызым, кызым!» – дип кычкырам...»: блогер Айназ Габидуллина фатирында түшәм ишелгән

Кызыклы видеолар төшерүче блогер, язылышу тантаналарын алып баручы Айназ Габидуллинаның фатирында аш-су бүлмәсендә түшәме ишелеп төшкән. Түшәм ватыклары бөтен бүлмәгә таралган, зур-зур кисәкләре дә бар. Бүлмәдәге өслекләргә зыян килгән. Шөкер, ул вакытта аш-су бүлмәсендә беркем дә булмаган, юкса балалар да өйдә булган.

«Әле дә ярый беребез дә анда булмадык. Аллаһ саклады!» – дип яза Айназ. Аның сүзләренчә, ул вакытта зур кызлары Нурия зал бүлмәсендә уйнап утырган, ә Айназ сабые Алия белән йокы бүлмәсендә булганнар.

«Мин Алияне йоклатып маташа идем. Үзем дә, изрәп китеп, хыялланып ята идем. Бер мәлне савыт-саба белән шкаф төшкән кебек тавыш ишетәм. Минем беренче уй: «Нурия өстенә нидер төшә!» «Кызым, кызым!» – дип кычкырам. Ул җавап бирми, шок булгандыр инде. Алияне калдырып йөгереп чыктым, караса-а-а-м… Шөкер, үзебез исән-сау. Йокы бүлмәсеннән йөгереп чыгып җиткәнче ярты гомер картайдым», – дип сөйли ул.

Алар ремонтны төп-төгәл 7 ел элек ясаткан булганнар. Судка бирерлек эш инде.

Чыгасы акча булгандыр. 17 меңгә зур өстәл алган идек. Мин анда Алияне салып тора идем. Өстәлнең уртасы чатнаган, көннәрдән бер көнне ул ишелер инде, алыштырасы булыр аны. «Столешница» яньчелгән. Түшәмне ясатасы була, ремонтка әзерләнәсе инде. Бер караганда – судка бирерлек эш, без бит профессиональ эшчеләр чакырмадык, бер абый гына эшләп бирде.

Ниндидер «покрытие» булмаганга ишелеп төшкән, диделәр, ремонт эшенең ниндидер этабы башкарылмаган. Аллаһка шөкер, без исән-сау. Өй тулы кеше иде. Йөрәгем алынды. Анда кеше булган булса, исән калган очракта да, гарип буласы иде. Ремонт ясатуны ышанычлы кешеләргә тапшырыгыз, уен эш түгел, – ди ул.