«Кыз бала ут капкан анасын коткарырга маташты»: Уфада яшәүче ир хатынын яндырып үтергән

Уфада суд 45 яшьлек ир-атка карата хөкем карары чыгарган. Ул «аеруча вәхши ысул белән үтерү» маддәсе буенча хөкем ителгән. Бу турыда «Башинформ» яза.

Тикшерү комитеты белешмәсе буенча, 2021 елның 17 сентябрендә «Дубрава-Радио» бакчачылык ширкәтендә бакча йортында ир белән хатын талаша. Бу вакыйганы аларның балигъ булмаган яшьтәге кызы күреп тора. Ир-ат 45 яшьлек хатынының өстенә янучан сыеклык сибә һәм ут төртә.

Кыз бала ут капкан анасын коткарырга маташа, янгынны сүндерергә тырыша. Аннары ул ашыгыч ярдәм чакыра. Хатынның башы, муены, гәүдәсе, аяк-куллары – гәүдәсенең 76 проценты 2 һәм 3 нче дәрәҗәдә пешә. Табиблар тырышлыгына карамастан, ул 2021 елның 11 октябрендә хастаханәдә үлә.

Ир гаебен өлешчә генә таный. Суд аны 16 елга каты режимлы колониягә хөкем итә, диелә хәбәрдә.