Татарстан бакчачылары кыяр яфракларының аксыл төскә керүенә, кырыйлары саргаеп кибә башлавына игътибар иткән. Бу – пәрәвезле талпаннар (паутинный клещ). Блогер Мария Гарәпшина моннан котылу ысулын сөйләгән, дип яза «Челнинские известия» газетасы.
«Башта зарарланган яфракларны кисеп ташларга кирәк. Соңыннан туфракны йомшартырга, аңа инсектицидлар – фитовер, клещегон, актовир, искра био сибәргә кирәк. Шулай ук теплица стеналарын да эшкәртеп чыгу мөһим, чөнки корткычлар анда да утырып кала. Яфракларның астына да, өстенә дә сиптерергә кирәк. Препаратларның кабында күрсәтелгән инструкция буенча эшләү зарур. Шулай ук эшкәрткәннән соң кыярны күпме вакыт ашарга ярамаганына да игътибар итегез», – дип аңлаткан Мария Гарәпшина.
