Кыш көне диңгез буена барып ял итүнең нинди куркынычы бар?
Кеше 30 градуслы салкыннан 30 градуслы эссегә киткәч, калкансыман биз стресс кичерә.
Калкансыман биздә гиперфункция ачыкланган кешеләргә диңгезгә бармау хәерле. Бу турыда «Вечерняя Москва» радиосында табиб-эндокринолог Татьяна Суслова сөйләгән.
Табиб бу авырулар диңгезгә баргач тиреотоксикоз кискенләшергә мөмкин булуын искәртә. Халыкның күбесендә исә калкансыман биз белән проблемалар бар, ди ул.
Суслова сүзләренчә, ял итәр өчен эссе диңгез климатына күченгәндә калкансыман биз климат үзгәрешенә яраклашырга ярдәм итә.
«Ул саклаучы һәм организмның эчке климатын көйләүче булып хезмәт итә. Ләкин ул моны кисәк кенә башкара алмый. Кышкы режимнан җәйге режимга һәм киресенчә күчү өчен органга берничә ай таләп ителә», — ди табиб.
Аның сүзләренчә, берничә ай эчендә калкансыман биз кан тамырлары системасын тарайта яки киңәйтә, һәр күзәнәккә гормоннар агымын арттыра яки киметә.
Кеше 30 градуслы салкыннан 30 градуслы эссегә киткәч, калкансыман биз стресс кичерә. Берничә ай эшли торган эшне аңа берничә сәгатьтә эшләргә кирәк була. Салкынга әйләнеп кайткач процесс кабатлана.
Отпускка китәр алдыннан табиб белән киңәшләшү кирәк, ди Суслова.