Кыш Бабайның пенсиясе ничә сум чыга?
Кыш Бабай эшли торган пенсионер булгач, аның пенсиясе индексацияләнми. Тик аның карамагында балигъ булмаган оныгы - Кар Кызы бар.
Кыш Бабайга 10 221 сум пенсия исәпләгәннәр. Бу сумманы Свердловск өлкәсен пенсионерлар партиясенең төбәк бүлекчәсе исәпләп чыгарган. Әлеге документ Лента.ру сайты карамагында бар икән.
Хезмәт стажы 1937 елдан башланса да (СССРда Яңа ел чыршысын шул чактан бәйрәм итәләр), аның Свердловск өлкәсендә тиешле пенсия түләүләре ун мең сумнан бераз гына күбрәк килеп чыккан.
Кыш Бабай - эшли торган пенсионер булу сәбәпле, аның пенсиясе индексацияләнми. Аның өчен бердәнбер өстәмә түләү — балигъ булмаган оныгын — Кар Кызын тәрбияләү өчен була, дигәннәр партиядә.
Узган елда Кыш Бабайның матди халәте яхшырмаган. «Кыш Бабай пенсионерларның яшәү минимумы өстәмәгә генә өметләнә ала, ул киләсе елга 10277 сум була», дип аңлатканнар партиядә.