Кыргызстанның яңа президенты портретын түрәләр бүлмәсенә элмәскә кушты
Садыр Жапаров халыкның тормыш сыйфатын яхшырту өчен әлегә берни дә эшләмәдем дип саный.
Кыргызстан Президенты Садыр Жапаров үзенең портретын бүлмәләргә элеп куймауны үтенеп, түрәләргә мөрәҗәгать иткән. Бу турыда президентның матбугат сәркатибе Галина Байтерекка сылтама белән РИА Новости хәбәр итте.
«Президент Садыр Жапаров безнең гражданнарның тормыш сыйфатын яхшырту өчен әлегә берни дә эшләмәдем дип саный. Шуңа күрә ул дәүләт хакимиятенең барлык органнарына да үзенең портретын бүлмәләргә һәм административ биналарга элеп куймаска киңәш итә», — ди матбугат сәркатибе.
Жапаров фикеренчә, түрәләргә Кыргызстан АССР халык комиссарлары советының беренче рәисе Йосып Габдрахманов, Республика компартиясе үзәк комитетының беренче секретаре Исхак Раззаков портретын элү хәерле. «Алар Кыргызстанның дәүләтчелеген һәм социаль-икътисади үсешен ныгытуга бәһасез өлеш керткән», - дигән яңа президент.
Садыр Жапаров 10 гыйнварда президент сайлауда җиңде. Сайлаучыларның 79 проценты Җапаров өчен тавышын биргән.