Кыргыз хатыны, динен яклап, яулыгын салдырырга маташкан полицейский белән сугышкан

Мәскәүдә полиция бүлегендә Кыргызстаннан килгән хатын-кызның яулыгын салдырырга теләгән капитан тән җәрәхәтләре алган. Хатын-кыз яулыгын дини карашлары аркасында салудан баш тарткан. Бу хакта BAZA «Телеграм» каналы яза.

13 февральдә Асел Кадырованы полиция наряды Головинский районы буенча бүлеккә алып килә. Хатын-кызның регистрациясе булмаган.

Бүлектә 33 яшьлек хатын-кызның бармак эзләрен алалар һәм фотога төшерәләр. Анда капитан Чаплыгина Кадыровадан яулыгын салуны таләп итә. Хатын-кыз яулыгын салудан баш тарта. Шуннан соң Чаплыгина яулыгын башыннан алып ташлар өчен аңа үрелә, Асел берничә мәртәбә капитанга суга, тырный, погоннарын өзеп төшерә. Бүлеккә хәтта «ашыгыч ярдәм» чакыртырга туры килә. Табиблар Чаплыгинаның уч төбендә берничә тырналган урын, гематома булуын ачыклый.

Асел Кадыровага административ хокук бозу турында беркетмә төзиләр.