Кырау төшкән үсемлекләрне ничек терелтеп була - ике ысул өшегән үсемлеккә җан өрә ала

Кырау төшү сәбәпле зыян күргән үсемлекләрне ничек терелтергә? Бу хакта «Башкортостан» гәзитенә бакчачы Фәридә Зәйнуллина сөйләгән.

1. Бакчага үсеш стимуляторлары сиптерергә кирәк. Бу катнашма яшелчә өчен дә, җиләк-җимеш культуралары өчен дә кулай: 10 литр суга 1 грамм исәбеннән янтарь (гәрәбә) кислотасы,10 литрга 2 миллилитр «Эпин Экстра» яки 10 литрга 100 миллилитр «Стимул». Эшкәрткәннән соң үсемлекләрне кояш яндырмавын хәл итегез, күләгә булдырыгыз. Зыян нык булса, 5-7 көннән шул ук состав белән тагын эшкәртегез.

2. Үсентеләрне тукландырыгыз. Җир өстендәге өлеше мөмкин кадәр тизрәк терелсен өчен, азот бирегез. Минераль ашлама – 10 литрга 20 грамм исәбеннән мочевина, нитрофоска, аммиак селитрасын, шулай ук органика – кош тизәген (1:20 исәбеннән), сыер тизәген (1:10 исәбеннән) кулланырга мөмкин.

Өшегән үсемлекләр бераз артка калачак, әмма яхшы тәрбияләгәндә, күтәрелеп китәчәк һәм барыбер уңыш бирәчәк, ди тәҗрибәле бакчачы.