Күз күреме начарая башласа, күпләр халык медицинасы ысулларына мөрәҗәгать итә: рационга кара җиләк (черника) белән кишер өсти, күзләр өчен гимнастика ясый, «катарактаны дәвалый» диелгән тамчылар тамыза. Әмма бу ысулларның берсе дә күз күремен яхшыртмый. Бу хакта «Газета.Ru» басмасына Мәскәүнең «3Z» клиникасы баш табибы Оксана Кузнецова сөйләгән.
Аның әйтүенчә, кара җиләк белән кишер сәламәтлек өчен файдалы була ала, әмма алар күз күремен үзгәртә алмый. Белгеч халык медицинасы ысуллары белән дәвалануга сак карарга һәм аларны барлык проблемалардан коткара торган универсаль чара дип карамаска киңәш итә.
Күз өчен гимнастика да рефракция аномалияләрен төзәтүнең ышанычлы юлы түгел. Кайбер очракларда табиб махсус күнегүләр тәкъдим итә ала, әмма алар күзлекләрдән тулысынча баш тарту өчен гарантия бирми, дип аңлатты белгеч.
Дөрес туклану, күнегүләр яки халык чаралары күзнең оптик системасын үзгәртә алмый. Ерактан күрмәү, якыннан күрмәү һәм астигматизм күзлек яки контактлы линзалар ярдәмендә төзәтелә. Кайчак, тискәре йогынтысы булмаган очракта, күз күремен лазер белән төзәтү дә мөмкин. Катаракта вакытында томанланган хрусталик хирургия юлы белән алына һәм ясалма линзага алыштырыла. Оксана Кузнецова әйтүенчә, табиб даруларны һәм тамчыларны билгеле бер авырулар булганда гына билгели.