Курск өлкәсендә аэродромга беспилотник һөҗүм иткән. Бу хакта губернатор Роман Старовойт Телеграм каналында хәбәр итте, дип яза РИА Новости.
«Курск аэродромы тирәсендә беспилотник һөҗүме аркасында нефть туплагычка ут капты. Зыян күрүчеләр юк. Янгын сүндерелә. Урында барлык махсус хезмәтләр дә эшли», – дип язган ул.
Курск аэропорты граждан самолетларын кабул итми һәм җибәрми. 24 февральдән башлап, Россиянең көньягындагы һәм үзәгендәге күп кенә аэропортлар кебек үк, анда да очышларга чикләүләр гамәлдә.
Кичә Украина хәрбиләре Саратов һәм Рязань өлкәләрендә хәрби аэродромнарга һөҗүм ясарга омтылды. Оборона министрлыгы мәгълүматларына караганда, совет чорында җитештерелгән беспилотниклар кулланылган, әмма Россия авиациясе ПВО ярдәмендә бу аппаратларны бәреп төшерә алган. Һөҗүмдә техник составтагы 3 хәрби һәлак булган, тагын 4 кеше зыян күргән. 2 самолетның корпусына зыян килгән.
Хәрби ведомствода әйтүләренчә, бу һөҗүме белән Киев режимы Россия ерак авиациясенең хәрби эшен бозарга теләгән. Әмма бу Россия армиясенә Украинаның хәрби идарә системасына һәм аңа бәйле оборона комплексы объектларына массалы һөҗүм ясарга комачауламаган. Билгеләнгән 17 объектның барысына да зыян килгән, һөҗүм хәрби хәрәкәт районнарына чит ил коралларын китерүне бозган.