Күрше төбәктә яшәүче ир-ат кунагын үтергән дә мәетне машинага тагып, юлдан сөйрәп барган

Башкортстанның Дүртөйле районында яшәүче ир-атны үтергәннән соң, җинаять эше ачылган. Эчке эшләр министрлыгы белешмәсе буенча, җинаятьтә 45 яшьлек ир-аттан шикләнәләр. Ул мәетне трос белән машинага бәйләп, якындагы зиратка илтеп яшермәкче була. Бу турыда «Башинформ» хәбәр итте.

«Биредә яшәүче кешедән полициягә хәбәр килде. Ул Суккулово авылы янында юлда ир-ат мәете табуын, аның аяклары бәйләнгән булуын әйтте. Урынга хокук саклаучылар барды. Мәетнең Семилетка авылында яшәүче 51 яшьлек ир-ат булуы ачыкланды. Аның муенында пычак белән яраланган эзләр бар.

Шуннан соң җинаятьтә шикләнелүче ачыкланды. Видеокүзәтү камералары язмаларын өйрәнделәр. Кадрларда төнлә узып баручы машина белән 45 яшьлек ир-ат идарә иткән, дип фаразлана. Ул вакытлыча атасы янында Суккулово авылында яши», – дип аңлатканнар ведомствода.

Якынча версия буенча, 51 яшьлек ир-ат яңа танышы – Суккулово авылында яшәүче 45 яшьлек ир-атка кунакка килә. Авылдашлар – 5 кеше – көн буе хәмер эчә, кичкә таба исерәләр, мунчага күчәләр, анда эчүне дәвам итәләр.

Шул чакта яңа танышлар талаша башлый. Өй хуҗасы – 45 яшьлек ир-ат – кунакның муенына берничә тапкыр пычак кадый. Кунак ир-ат үлгәнен аңлагач, ул мәетне яшерергә була. Корбанының аякларын бәйли, мәетне пленка белән төрә, аннары мәетне трос белән машинасына бәйләп куя. Шулай итеп мәетне сөйрәп, зиратка таба китә. Биредә ул мәетне яшермәкче була.

Ләкин юлда барганда трос өзелә. Җинаятьче мәетне кабат машинасына тагып тормый, юл уртасында ташлап калдыра да үзе өенә кайтып китә. Тиздән аның өенә полиция килә.

Хәзер тикшерү эшләре бара, диелә хәбәрдә.