Күрше төбәктә урман ташый торган «КамАЗ» астында калган машинада дүрт кеше үлгән

Киров өлкәсендә юл һәлакәтендә берьюлы 4 кеше үлгән. Бу турыда «Вести» каналы хәбәр итте.

Фаҗига бүген, 24 гыйнварда, көндез була. Киров өлкәсенең Слободский районында Слободский – Нагорск автоюлында «Лада Ларгус» машинасы урман ташый торган «КамАЗ»га бәрелә. «КамАЗ» каршы яктан килә.

Авария урынында төшерелгән фотодан күренгәнчә, җиңел автомобиль йөк машинасы астында калган диярлек.

Эчке эшләр министрлыгы белешмәсе буенча, фаҗига урынында 4 кеше – «Лада Ларгус» йөртүчесе һәм аның 3 пассажиры үлә. 

Тикшерү эшләре бара, диелә хәбәрдә.