13 апрельгә каршы төндә Йошкар-Ола шәһәренең Йыван Кырли урамында юл һәлакәтендә 2 кеше үлгән. Бу турыда «Вести» каналы хәбәр итте.
Фаҗига мизгелләрен видеорегистратор камерасы төшереп алган.
Мари Эл Республикасы ЮХИДИ белешмәсе буенча, «Лада Приора» белән 30 яшьлек ир-ат идарә итә. Ул, зур тизлектә барган килеш, электр тапшыру линиясе багасына бәрелә.
Авария урынында ук 2 кеше – «Лада Приора» йөртүчесе һәм аның пассажиры үлә. Салондагы тагын 1 кеше исән кала, ул авыр хәлдә хастаханәдә ята, диелә хәбәрдә.
Төбәк прокуратурасы күрсәткән видеодан аңлашылганча, авария алдыннан бу машина юл инспекторларыннан качарга маташкан.