Күрше төбәктә «ашыгыч ярдәм» машинасы белән авариядә бер кеше үлгән, тагын берсе комада

Башкортстан юлында «ашыгыч ярдәм» машинасы авариягә очраган. 1 кеше урында ук һәлак булган, тагын 1 кеше комада. Бу турыда «Башинформ» агентлыгы Әлшәй районы администрациясе башлыгына сылтама белән хәбәр итте.

Бүген, 30 мартта, Стәрлетамак – Раевка юлының 33нче километрында «Форд Мондео» автомобиле «УАЗ» «ашыгыч ярдәм» машинасына бәрелә. «Форд» йөртүчесе урында һәлак була.

Дамир Мостафин сүзләренчә, «ашыгыч ярдәм» машинасы Әлшәй районыннан авыру пациентны алып китеп бара булган. Авария вакытында салонда 5 кеше була, аларның барысына да табиблар ярдәме таләп ителә. Имгәнгән кешеләрне Стәрлетамак хастаханәсенә китергәннәр. 

«Ашыгыч ярдәм» машинасын йөртүче комада, аның гомерен саклап калу өчен табиблар тырыша, диелә хәбәрдә.