Мордовиядә 15 яшьлек үсмер малайны соңгы юлга озаттылар. Ул туганнарын янгыннан коткарган. Бу турыда Столица сайты хәбәр итте.
8 февральгә каршы төндә Теньгушево район үзәгендә шәхси йортта янгын чыга. 15 яшьлек Игорь Кузьмин шунда үлә. Үсмернең әтисе махсус хәрби операциядә була.
Янгын чыккач, егет туганнарына хәбәр итәргә өлгерә. 12 яшьлек энесе, 10 яшьлек сеңлесе һәм әнисе уттан чыга. Ләкин Игорь үзе котыла алмый.
Мордовия башлыгы карары белән, Игорь Кузьминны «Батырлык һәм кыюлык өчен» билгесе белән бүләклиләр. Үлгәннән соң, диелә хәбәрдә.
9 февральдә Игорьне җирләргә бик күп кеше килә. Әтисе дә кайтып өлгерә. Ул госпитальдән чыгып кайта.
«Куркыныч вакытында үзе турында уйламаган. Ул әнисен, энесен, сеңлесен коткарырга теләгән», – ди матәм чарасында чыгыш ясаучылар.
Игорьнең энесе белән сеңлесе хәзер республика балалар хастаханәсендә. «Кыз хирургия бүлегендә. Табиблар аның хәлен уртача авырлыкта дип бәяли. Малай бик каты пешкән, ул реанимациядә ята. Безнең табиблар Федераль пешү медицина үзәге белән элемтәдә тора, кирәк булса, хезмәттәшләре белән киңәшләшәләр. Хастаханәдә җиһазлар заманча, балаларны тәүлек әйләнәсендә табиблар күзәтеп тора. Гаиләгә ярдәм итәчәкбез», – дип яза республика башлыгы Артем Здунов «Телеграм» каналда.