Күрше бакчадагы агачлар комачауласа, аларның ботакларын кисеп ташларга ярыймы? Бу сорауга җавап «АиФ» сайтында чыкты.
Күрше участогыннан чыккан агач ботакларын үзеңә кисәргә ярыймы?
Бакчачылык (дача) турында кагыйдәләр нигезендә, биек булып үсә торган агачлар өчен күрше участогы чигенә кадәр ераклык кимендә 4 метр, ә уртача үсә торган агачлар өчен кимендә 2 метр булырга тиеш.
Әгәр күрше агачының ботаклары сезнең участокны күләгәли, яисә җимешләре, яфраклары сезнең түтәлләрне пычрата икән, башта күршегезгә мөрәҗәгать итәргә кирәк. Зыян китерүче ботакларны кисүен сорап, гаризаны язма рәвештә бирү яхшырак, һәм эшне кайсы көнгә кадәр башкарырга кирәклеген күрсәтергә киңәш ителә. Бу – күршенең бурычы: агач һәм куаклар үз территориясеннән чыкмаска тиеш.
Күрше күрсәтелгән вакытта ботакларны кисмәсә, сез аларны үзегез дә кисәргә хокуклы, дип аңлата юрист Олег Сухов. Моның нәтиҗәсендә агач һәлак булса да, җаваплылык күршедә була. Чөнки монда ике якның хокук һәм бурычлары үзара бәйләнештә.
Әгәр күрше агачының ботаклары сезнең җирегезгә керә икән – бу турыдан-туры сезнең милек хокукын бозу булып санала. Аларны үзегез кисәргә яисә секатор белән кыскартырга була. Үзегез эшләргә теләмәсәгез, күршегезгә таләп куярга мөмкин. Әгәр ул игътибар итмәсә, судка мөрәҗәгать итү хокукы бар. Ләкин гадәттә мондый бәхәсләр судка кадәр барып җитми, чөнки кешеләр вакыт һәм акча сарыф итәргә теләми.
Юрист Сергей Кормилицин әйтүенчә, иң яхшысы – күршегә рәсми хат язу, ул имзасын куймаса, хатны почта аша хәбәрнамә белән җибәрү. Шулай ук бакчачылык ширкәте идарәсенә мөрәҗәгать итеп, күршегезне агачны кисәргә мәҗбүр итәргә мөмкин. Әгәр ботаклар сезнең хокукларны бозса (участокны күләгәли, хәвеф тудыра һ.б.), суд аша да күршене җаваплы итәргә була. Әмма үзлегеңнән кисү, кайчак, «чит милекне зыянлау» дип бәяләнергә дә мөмкин.
Йомгак
Мәсьәләне иң элек сөйләшү аша хәл итү яхшы: күршегезгә ботакларның комачаулавын аңлатыгыз, аларны кисүен сорагыз. Игътибар итмәсә – рәсми хат белән мөрәҗәгать итегез. Әгәр дә нәтиҗәсе булмаса, бакчачылык ширкәте идарәсенә, аннары судка мөрәҗәгать итәргә туры киләчәк. Әлбәттә, ботакларны үзегез дә кисә аласыз, әмма һәрвакыт дусларча һәм тыныч юл белән аңлашу отышлырак.
