"Куркынычсызлык каешын ычкындырырга өлгермәгәннәр": Шереметьеводагы самолетта үлүчеләрнең котылу мөмкинлеге булмаган

Шереметьево аэропортында һәлакәткә очраган "Суперджет" самолетындагы кешеләр сумкаларын алу аркасында, башкаларга чыгарга комачаулаган дигән хәбәр дөреслеккә туры килми. Бу турыда "Вести" каналы хәбәр итә.

5 майда, Шереметьево аэропортында Sukhoi Superjet-100 самолеты һәлакәткә очрады. Мәскәү-Мурманск рейсы буенча оча торган лайнер бортында 78 кеше булган. 40 пассажир һәм бер бортпроводник егет үлгән. Тугыз кеше хастаханәдә ята.

Моңа кадәр бизнес-класс пассажирлары әйберләрен алу аркасында, башка пассажирлар яна торган салоннан чыга алмыйча, һәлак булган дигән хәбәрләр таралды. Хокук саклау органнары шул хакта аңлатма биргән. Самолетның койрык өлешендә утырган пассажирлар берничек тә котыла алмас иде, дигән алар. "Алар куркынычсызлык каешларын да ычкындырырга өлгермәгән. Шунда ук аңнарын югалтканнар. Бу кешеләр төтенгә тончыккан", дип аңлатканнар.

Хәзерге вакытта мәрхүмнәрнең шәхесен ачыклау эшләре бара.

Комментарийлар (0)