Танылган алып баручы, журналист Гөлназ Сәфәрованың да «троюродный» энекәше мобилизациягә эләккән. Кичә кич кенә Гөлназ аның янына полигонга барган. Шунда күргәннәре белән ул социаль челтәрдәге аккаунтында уртаклашкан.
«Энекәшне мобилизацияләделәр. Хәзер сугышка китәргә әзерлиләр...
Аның янына полигонга бардык. Кич монда туганнарны кертәләр икән. Мондагы кеше-е-е, мондагы яшьлә-ә-әр... Татарстанның төрле районнарыннан балаларын күрергә дип килгән ата-аналар...
Куркыныч... Пычрак. Пакет-пакет әйбер күтәреп, егетләрнең туганнары агыла. Менә монда капка янына гына чыгаралар. Ишетәсезме, кайберәүләре янына кечкенә балалары да килгән, әтиләренең муеннарына ябышканнар. Сагынышканнары күренеп тора.
Йөрәгем әрни... Үзеннән-үзе күзгә яшьләр тыгылды! Елата...
Исән-сау гына әйләнеп кайтсыннар инде, Я Раббым!
Нәрсә көтә икән безне????» – дип, хис-кичерешләрен язган журналист.
Фотолар: Гөлназ Сәфәрованың социаль челтәрдәге шәхси аккаунтыннан