«Күңел»нең килүе – көтеп алынган вакыйга»: Радионы Актаныш һәм Мөслимдә дә ишетеп булачак

1997 елда Чаллы шәһәрендә үз эшчәнлеген башлап җибәргән «Күңел» радиосы дулкыннары киңәя. Хәзер бу радионы Актаныш һәм Мөслимдә дә ишетеп булачак. 11 сентябрь көнне Актанышта «Күңел» радиосы яңгырый башлавы уңаеннан «Җырлы сәяхәт» дип аталган зур бәйрәм булды. Хәзер «Актаныш» радиосы да шушы ешлыкка кушылачак.

– Кадерле дуслар, якташлар, – дип мөрәҗәгать итте Мөслим районында «Күңел» радиосы ачылу уңаеннан узган чарада «Татмедиа» Республика матбугат һәм массакүләм коммуникацияләр агентлыгы җитәкчесе Айдар Сәлимгәрәев. – Рәхмәт, Сабан туена кебек җыелышып килгәнсез. Димәк, безнең радио сезгә ошый. Ул ничә ел Чаллыда эшләп килә, яңа төбәкләргә килә. Киләчәктә дә рухи тормышны баетып, матур гына эшләп килсен. Сезгә ошасын! Концертлар белән кайтабыз, дип әйтә коллегаларыбыз. Бергә яшәргә язсын, барыгызга да рәхмәт!

«Татмедиа» акционерлык җәмгыяте генераль директоры Шамил Садыйков:

Бу – «Күңел» радиосы коллективы, Актаныш, Мөслим халкына «Татмедида»н зур бүләк. Әлеге районнарда безнең телебезне, мәдәниятебезне саклаучы милли эчтәлекле халык яши, татар аудиториясе бик көчле. Анда татар телендә телевидение эшли, газеталар чыга. Актанышта радио тарихы 30нчы еллардан башлана. Аның зур традицияләре, эчтәлеге бар. Кама аръягында «Күңел» радиосы – иң беренче татар радиосы. Халык тарафыннан яратылган радио. «Күңел»нең килүе – көтеп алынган вакыйга.

Кичә Актанышта мәдәният йорты каршында концерт булды. Мәйдан кеше белән тулы иде. Радиога ихтыяҗ зур булуын күрәбез. Интернет үскән заманда телевидение дә цифрлыга күчте, кеше белән элемтәдә булу өчен бүгенге көндә җирле редакцияләр өчен иң кулае – радио, туры элемтә. Һәрбер машинада радиоалгыч тора, безнең өчен бөтен кеше белән туры элемтәдә эшләргә, җирле яңалыкларны җиткерергә, җирле тарихны сөйләргә кулай.

Тагын бер мөһим өстенлек: Актаныш та, Мөслим дә Башкортстан белән чиктәш урнашканнар. Анда безнең бик зур аудитория, бик күп татарлар яши. Бу радиостанцияләр турында хәбәрләр килә башлады. Программада катнашучылар шалтыраталар: Удмуртия, Нефтекамск, Агыйдел шәһәрләреннән. «Күңел» радиосын тыңлый башлаганнар. Бүген «Күңел»не бөтен күрше районнарда, Илештә тыңлый алалар, һәм аннан аудитория бик актив рәвештә җавап бирә, программаларга шалтыраталар. Бу – безне бик сөендерә, чөнки күрше районнардагы татарларга, милләттәшләребезгә татар телен ишетеп, татар музыкасын тыңлау мөмкинлеге ачылды, – диде ул.

– Без бик шат. Бу – матур бәйрәм. Бу – җәйнең соңгы матур көннәредер. Шундый көндә «Күңел» безнең күңелне ача, алар бездә эшли башлый. Элек без ияләшкәнчә, уникедән бергә кадәр радио булачак, матур җырлар, котлаулар белән. «Күңел» радиосына зур рәхмәт, үзебезнең телне, моңны баетып эшләргә язсын!

«Күңел» радиосын яратканнарын күрсәттеләр»

«Күңел» радиосы җитәкчесе Лилия Мәхмүтова:

Актаныш һәм Мөслим районнарында «Күңел» ешлыклары ачылу – безнең радио тарихында зур вакыйга. Без бу көнне бик көттек. Актаныш халкы белән без күптәннән таныш идек: алар «Күңел» радиосын бик күп еллар онлайн рәвештә тыңладылар. Актанышта бик актив халык яши, даими хәбәр язып торучыларыбыз да бар. Кичәге чарада да Актаныш халкы үзенең активлыгын күрсәтте. Актанышта менә мондый урам чаралары, Казан артистлары белән үтә торган чаралар бик үк еш булмаганлыгы сизелде. Алар шулкадәр сусаганнар, мәйдан тутырып халык җыелды. Актанышта «Күңел» радиосы ачылуы безнең өчен сөенечле вакыйга булды. Алар үзләренең телне камил белүләре, оста, чиста һәм тәмле телле булулары белән аерылып торалар. «Күңел» радиосының алып баручылары да башка радиоларга караганда аерылып тора, музыкаль бизәлеш тә үзгә.

Мөслим районында «Күңел» радиосы 67,79 УКВ ешлыгында эшләгәндә, мөслимлеләр безне актив тыңлыйлар иде. Ул якларда безнең радио тота иде. Бик күпләп килгән котлау хатлары да шушы Мөслим районыннан булды. Без Мөслим халкы белән дә таныш. Аларның үзләренең җирле радиолары да эшләячәк, Актанышта да шулай ук. Алар «Күңел» ешлыгында берничә сәгатькә кереп алачаклар. Бу тыңлаучыларга берьюлы 2 радио тыңлау мөмкинлеге бирә.

Әлеге районнарда кичә һәм бүген үзебезнең алып баручыларны күрсәтеп, радиобыз турында сөйләп, район халкы белән таныштык. Актанышка да, Мөслимгә дә без тагын концерт программалары белән дә барырбыз, дип планлаштырабыз. Бу инде кыш айларында булыр.

Җитәкчелеккә, «Татмедиа» җәмгыятенә, агентлыгына зур рәхмәтебезне белдерәбез. Актаныш районы һәм Мөслим районы башлыкларына да рәхмәт. Алар безне колач җәеп каршы алдылар. «Күңел»не яратканнарын күрсәттеләр һәм «Күңел» радиосының кирәклеген ассызыкладылар, – диде радио җитәкчесе.

«Хәзер халык күңеленә якын радионы сайлап тыңлый ала»

«Актаныш-информ» филиалы җитәкчесе Айнур Гыймадиев:

Бездә – Актаныш районында – «Болгар» радиосы гына тота иде. Хәзер инде бездә «Күңел» радиосы да барлыкка килде. Минемчә, ул – динамикалы, хәрәкәткә баерак радио. Элек сайлау мөмкинлеге юк иде. Хәзер инде халык үзенең күңеленә якынрак радионы сайлап тыңлый ала. Моңа кадәр «Болгар» радиосы монополист иде. Хәзер «Күңел» дә булгач, алар бергә матур итеп эшләрләр, дип уйлыйм. «Күңел» радиосы Башкортстанга кадәр чыгып җитә, аны Нефтекамскида, Илеш районы, Агыйделдә дә тыңлый алачаклар.

Без – «Актаныш» радиосы – башта «Болгар» радиосында эшләдек. Анда без үзебезне «Актаныш тапшырулары» гына дип әйтә ала идек. Хәзер без «Күңел»гә кергәч, безнең лицензиябез булачак. «Күңел» ешлыгында «Актаныш» радиосы да чыгачак. Эфир вакытларыбыз: иртәнге 7дән 8гә кадәр, көндез 12-13 сәгатьләрдә һәм кичен 19-20 сәгатьтә. Шушы вакытта үзебезнең Актаныш тапшырулары чыгачак: әңгәмәләр, туры эфирлар.

2022 елда яхшы гына ремонт ясадылар, студияләр булдырылды. Болар район башлыгының тырышлыгы белән булды. «Татмедиа» заманча җиһазлар белән тәэмин итте. Шуның бәрабәренә туры эфирга чыгу мөмкинлеге туды. Туры эфирга ихтыяҗ зур. Төрле тарихи шәхесләр, авыл кешеләре һәм безнең район халкы өчен башка актуаль темаларга булачак, – дип аңлатты ул.

«Бу – татарны таныту, күрсәтү дә»

«Мөслим-информ» җитәкчесе Римма Афзалова:

Әлегә кадәр бездә – Мөслим районында – «Болгар» радиосы гына эшли иде. Халык арасында «Нигә бездә бер генә радио?», «Нигә башка радиолар эшләми, аларны тыңлап булмый?» дигән фикерләр ишетергә туры килә иде. «Күңел» радиосының Мөслимгә керүен без бик шатланып кабул иттек. Аның эшли башлавына әле күп түгел, шуңа да карамастан, халык аны тыңлый. «Күңел»дә яңарак җырлар яңгырый, кабатланмыйлар, дигән фикерләрне ишеттек. Бүген Мөслимдә «Күңел» радиосының концерты була. Халык актив булып килер, радионың алып баручыларын һәм яраткан артистларын да күрер, дип ышанып калам. «Күңел»нең Мөслимдә эшли башлавының тагын бер уңай ягы: «Мөслим» радиосы да аның дулкынында эшләр, дип көтәбез. Бәйрәм шушы вакыйга уңаеннан да оештырыла. Әлеге хезмәттәшлек бөтенебезгә дә: «Күңел»гә, безгә һәм «Татмедиа»га да файдалы булы, дип ышанып калабыз. Киләчәктә «Мөслим» радиосының тыңлаучыларын югалтмабыз, дип ышанам һәм хезмәттәшлегебез алга таба да уңышлы булыр, дип өметләнәм.

Бу – халыкка сайлап алу мөмкинлеге дә бирә. Кемгәдер «Болгар» радиосы ошый, кемгәдер – «Күңел». Татар радиолары күбрәк булган саен, безнең халыкның сайлап алу мөмкинлеге дә киңәя. Шул ук вакытта бу – татарны күрсәтү, таныту да, телебезне үстерү мөмкинлеге дә. Татарча радиолар күбрәк булган саен, татарча мәгълүмат чараларын күбрәк тыңлаган, укыган, караган саен, замана балаларында да үзенең милләте, теле белән горурлану хисләре көчәер, ныграк булыр, бәлки.

«Мөслим» радиосының үзенең тапшырулары, аның даими тыңлаучылары бар. Без, әгәр алар кабул итсә, «Күңел» радиосына тапшырулар әзерләргә риза. Алар радио ешлыгында безнең район газетабызның һәр санына күзәтү ясарга тәкъдим иттеләр.

«Күңел» радиосына керәчәк «Мөслим» радиосында мөслимлеләр генә аңлый торган, алар өчен актуаль, кирәк, алар өчен кызыклы тапшырулар дәвам итәчәк, яңалары да булачак, – дип сөйләде ул.

«Күңел» радиосы мине популяр итте»

«Күңел» радиосының «Җырлы сәяхәт» концертында чыгыш ясаячак җырчылар белән дә сөйләштек:

Җырчы Руслан Кираметдинов:

Мине кешелеккә «Күңел» радиосы чыгарды бит. Иң беренче җырларым «Күңел» радиосында яңгырады. Артист кешегә аның җырлары күбрәк яңгыраган саен яхшырак, шуңа күрә «Күңел» радиосы ачылу – бик күңелле вакыйга. Мин моңа шат кына. «Күңел» – бик матур, яхшы радио, – ди җырчы.

Җырчы Әлфинә Әзһәмова:

«Күңел» радиосы мине популяр итте. 2002 елда беренче җырларым шул радио ешлыгында яңгырый башлады. Казанга алар әле 2 елдан соң гына барып иреште. «Күңел» радиосы иҗатымда зур роль уйнады, алар аерым бер урынны алып тора. Мин аларны бик хөрмәт итәм, якын итәм, – дип җырчы радиога уңышлар теләп калды.

• «Күңел» радиосы 1997 елда эшли башлый.
• Радионы Чаллы, Тукай, Алабуга, Түбән Кама, Зәй, Мамадыш, Сарман, Әгерҗе, Менделеев районнарында тыңлап була.
• 2011 елдан «Күңел» радиосын интернет аша online режимда тыңлау һәм карау мөмкинлеге булдырыла.
• 2015 елдан радио Чаллыда 92,6 FM ешлыгында эшли башлый.