Күнекмәләрдән кайтып компьютер уйнарга утырган 16 яшьлек футболчының йөрәге туктаган
«Ротор» Волгоград футбол клубының 16 яшьлек уенчысы Максим Семенов, күнекмәләр уздырып кайтканнан соң, компьютерда уйнарга утыра. Ләкин кинәт кенә аның хәле китә, спортчыга шунда ук «ашыгыч ярдәм» чакырталар, ләкин яшүсмерне коткарып кала алмыйлар – ул өендә вафат була.
SHOT телеграмм-каналы мәгълүматлары буенча, үлем сәбәбе – үсмернең йөрәге туктау, диелә.
Семенов «Ротор» спорт мәктәбендә тәрбияләнә, «Родина» футбол клубы өчен чыгыш ясый. Күптән түгел Максим Көньяк лигада дебют уенын уздырган була.
