Петербургта 24 яшьлек кыз кырда сөйгән егете кулында катып үлгән. Бу турыда «Комсомольская правда» хәбәр итте.
24 яшьлек кыз һәм 27 яшьлек егет кунактан өйләренә кайтып бара. Төнлә салкын була, өстәвенә, алар адаша һәм ниндидер кырга килеп чыга, өши башлыйлар. Егет «ашыгыч ярдәм» чакыра.
«Егет сүзләренчә, алар кызы белән адашкан, туңган. Ул «ашыгыч ярдәм» чакырган, ләкин, табиблар килгәнче, кыз үлгән», – дигән «КП» чыганагы.
Урынга килгән «ашыгыч ярдәм» егеткә ярдәм итә. Махачкаладан килгән 24 яшьлек кыз исә инде үлгән була. Ул ярдәм көткән чакта сөйгән егете кулында үлә. Мәрхүмәнең гәүдәсендә өшегән урыннар булуы ачыклана.
Табиблар исә фаҗига булган урыннан ерак түгел генә бер йорт булуын күрә. Ләкин егет белән кызның ни сәбәпле шунда барып ярдәм сорамавы әйтелми, диелә хәбәрдә.