Кунакка килгән Чаллы кешесенә 19 тапкыр пычак кадаганнар

25 мартта Чаллыда 42 яшьлек ир-атны үтергәннәр. Судмедэкспертлар бу кешенең мәетендә 19 тапкыр пычак белән суккан эз санаган. Бу турыда «Челнинские известия» сайты хәбәр итте.

Канлы фаҗига ГЭС бистәсенең 8нче комплексындагы тулай торакта була. Иртәнге җиде тирәсендә канга баткан ир-ат мәете табыла.

Биредә яшәүче бер кеше бүлмәнең ачык ишегенә игътибар итә. Эчтә мәет булуын абайлап ала.

Урынга килеп җиткән полиция хезмәткәрләре һәлак булган ир-атның Чаллыда яшәүче 42 яшьлек кеше булуын ачыклый. Ул бирегә иптәше янына кунакка килгән. Алар бераз салып утырганнар. Шуннан талаш чыккан һәм кунак һәлак булган.

Тиз арада бу бүлмәнең хуҗасын тоткарлыйлар. Ул 57 яшьлек кеше, беркайда да эшләми, моңа кадәр хөкем ителгән булган.

Әлеге вакыйгадан җинаять эше ачылган, диелгән бу хәбәрдә.