«Кулланырга язмасын иде...» — Нурзадәнең тагын нинди һөнәрләре бар?
Җырчы Нурзадә үзенең нинди һөнәрләре булуы турында сөйләгән.
Җырчы Нурзадә яңадан пандемия башланып, концерт-банкетлар уздырылмый башласа да иписез калмас. Ни өчен дисезме? Чөнки җырчының шәфкать туташы һәм тракторчы-машинист һөнәрләре дә бар икән әле. Нурзадә инстаграмда үзенең дипломнарын күрсәткән.
«Минем әллә нинди һөнәрләрем бар икән ич. Әй, Аллам, уңган да инде үзем.
Гражданнар обороносы өчен шәфкать туташы. СССР заманы кешеләре ич без. Әле, җитмәсә, тракторчы-машинист икәнмен. Укылды инде. Имтиханнар бирелде. Мәктәптә малайлар төркемендә трактор дәресләрендә укыдым. Трактор, «Беларусь», ДТда йөри идек. Комбайн буенча да укыдык. Имтиханнар биргәндә юл кагыйдәләрен өйрәндек. Менә ни өчен миңа машина йөртү таныклыгына уку җиңел булган икән.
Институтта укыганда ике ел медицина өйрәндек. Уколлар кадарга, яраларны, сынган жирләрне бәйләргә. 15 нче хастаанәдә практика уза идек. Беренче тапкыр укол кадарга кергәндә кулларым калтырады.
Әле актарсаң, бу архивта әллә ниләр бардыр», — дип язган Нурзадә.
Инстаграм дуслары Нурзадәгә әлеге һөнәрләрнең кирәге чыкмавын теләгән. «Сугыш башланса, алып китәрләр…», «Украинага алып китә күрмәсеннәр, сак бул», — дигәннәр.
Бер абый Нурзадәне туган авылы Кенәргә табиб булып кайтырга чакырган. «Әкренләп тәҗрибә тупларсың, укырсың», — дигән.
«Әйбәтләп кара әле, бәлки никах дипломы да бардыр анда», — дип тә шаярткан берәү.