«Кулга-кул тотынышып яттылар»: 65 ел бергә яшәгән ир белән хатын берьюлы вафат булган
Бабай белән әбинең караватларын янәшә куйганнар.
Америкада яшәүче Джек һәм Харриет Моррисон өйләнешеп, 65 ел бергә яши. Аннары алар икесе бер көнне вафат була. Бабай белән әби соңгы көннәрен Миссури штатында урнашкан Сент-Луис шәһәрендәге картлар йортында үткәрә. Бу турыда St. Louis Post-Dispatch сылтама белән «Московский комсомолец» хәбәр итте.
Джекка 86 яшь, аның хатынына 83 яшь була. Бабай белән әби берничә сәгать аерма белән генә бер-бер артлы үлеп китәләр. Аларның караватлары да янәшә тора. Ир белән хатын бер-берсенең кулларын тотыша ала.
Джек белән Харриет 1955 елда Хэллоуин вакытында таныша. Алар ике ул үстерәләр. 2019 елда авырый башлагач, бабай белән әби картлар йортына күченә.
