Мәскәүдә яшәүче хатын-кыз шәхси клиникада күкрәген кечерәйтү өчен операция ясатканнан соң икенче көнне үлгән. Шәһәр прокуратурасы матбугат хезмәтендә хәбәр итүләренчә, әлеге факт буенча тикшерү үткәрелә. Бу хакта «Российская газета» яза.
Прокуратура мәгълүматларына караганда, хатын-кыз операцияне шәхси клиникада ясаткан. Рәсми сайттагы мәгълүматлардан күренгәнчә, әлеге клиникада маммопластика ясату бәясе 350 мең сум. Пациент 6 декабрьдә клиникага яткан, ә 7 декабрьдә иртән кинәт үлгән. Экспертлар хатын-кызның үлеменең төгәл сәбәбен билгели. Процессуаль тикшерү Пресня районара прокуратурасы контролендә.
Клиниканың рейтингы шактый югары, шуңа да карамастан, аның хезмәткәрләре соңгы 3 елда берничә тапкыр пациентларның канәгатьсезлеге аркасында конфликтлы ситуацияләргә эләккән. Пациентлар күп очракта әлеге клиникада операция ясатканнан соң бетми торган җөйләр калуга зарланган. Шулай ук маммопластиканың сыйфатына ризасызлык белдерүчеләр дә бар. Әмма медицина оешмасында әлеге очракка охшаган хәлләр моңарчы булмаган.