Кукмарада балалар мәйданчыгында таудан шуганда үсмер малай җир астына төшеп киткән

Кукмарада балалар мәйданчыгында таудан шуып уйнаганда, 12 яшьлек малай җир астына төшеп киткән. Әлеге урында юынтык сулар чокыры булган. Бу турыда «Татарстан 24» каналы хәбәр итте.

Бәхеткә, малай имгәнмәгән, аңа беренче ярдәмне урында ук күрсәткәннәр.

Хокук саклау органнары тикшерү башлаган. Ачыкланганча, балалар таганы һәм комлык урынында элек юынтык сулар чокыры була. Аның өстенә туфрак тутырганнар, грунтны тиешенчә ныгытмаганнар.

Җир убылган урынны махсус тасма белән әйләндереп алганнар, өстенә агач япма ясаганнар. Прокуратура да тикшерү башлаган.

«Хәзер бу чокырның ник кирәк булуын ачыклыйлар. Әгәр кирәк булмаса, плитканы ачып, чокырга грунт тутырабыз. Җир кипкәч, без ремонтлауга керешәбез», – дигәннәр башкарма комитетта.