Кукмара прокуроры: Ачык ишекләр көне урынына ачык күңелләр көне үткәрсәгез иде
Кукмара прокуроры: Ачык ишекләр көне урынына ачык күңелләр көне үткәрсәгез иде
Кукмара прокуроры Ришат Шакиров инстаграмында чираттагы фәлсәфи постын куйган.
"Ышаныч - бөер кебек ул. Бер тапкыр сугып имгәтсәләр, бетте, "трындец" дигән сүз. Шушы көннәрдә берничә язмага игътибар иттем: баксаң, гражданнарның дәүләт органнарына ышанычы әлләни югары түгел икән. Каян килсен инде ул, кешеләргә ачыклык җитми бит!
Кайберәүләр халык белән аралашканда: "Күңелеңне яп, чөнки ул каешсыз ыштан белән бер, ул гадәткә кермәгән", дип уйлый ахрысы дигән фикер туа. Җәмәгать! Ачыклык җитмәү ышанычсызлык һәм якланмаганлыкка китерә. Ачык һәм ихлас булу гына гражданнарның ышанычын кайтарырга булышачак. Берәр тапкын ачык ишекләр көне урынына ачык күңелләр көне үткәрсәгез иде", - дип язган Ришат Шакиров.
Прокурорның бу сүзләрен аның инстадашлары хуплый. Аңа комментарийлар калдыручылар арасында: "Сүзләрегез хак! Берәр тапкыр ил өчен коррупция зыяны турында да языгыз әле", - дип сораучы да бар.
- Ришат Шакиров - Татарстанда иң актив прокурорларның берсе. Аның эшчәнлеге матбугат чараларында еш яктыртылып барыла. Ул Апас районы прокуратурасы бинасы каршына Петр Беренчегә һәйкәл урнаштырды, чит илләрдән кертелгән азык төлек тыелгач, законсыз сатылган 3 венгр казын сатудан алдырып, юкка чыгаруга иреште, аның таләбе буенча АКШта җитештерелгән тавык итен сатучы 1, өлкәннәр өчен контент тәкъдим итүче 136, шартлаткычлар әзерләргә өйрәтүче 19 сайт ябылды. Кукмара районы прокуроры итеп билгеләнгәч, ул прокуратура турындагы мәгълүматны дүрт телдә - татар, рус, удмурт, мари телләрендә тәкъдим итә башлады һәм бина каршына Россия дәүләтенең беренче генерал-прокуроры Павел Ягужинскийга бюст куйдырды, Нюрнберг процессының 70 еллыгына багышланган рәсем конкурсы уздырды.