Кредитларны алдан түләп бетерүнең файдасы бармы?
Ипотека алучылар кредитны алдан түләп бетерергә тырыша.
Кредит рәсмиләштергәч, аның срогының икенче яртысында алдан түләп бетерүдән бер файда да булмый. Бу турыда Urvista компаниясенең генераль директоры Алексей Петропольский «Прайм» агентлыгына сөйләгән.
Белгеч фикеренчә, Россияда ипотека кредитларының барысы да диярлек аннуитет түләүләр белән түләнә. Ягъни кредит срогының беренче яртысында процентлар күләме генә чигерелеп бара. Шуңа күрә ипотека вакытының беренче яртысына кадәр түләп, аннары калган өлешен тулысынча түләп бетерүдән бер файда да юк.
Кредитны срокның беренче яртысында алдан түләгән очракта гына, процентларны азрак түлисең. Ә икенче яртысында төп бурыч түләнә. Бу вакытта кредитның процентлары түләнеп беткән була инде. Калган өлеше исә төп бурыч була. Аны алдан түләп бетерсәң дә, ай саен акрынлап түләп барсаң да була.
Әгәр юридик зат булса, ул очракта «экономия өчен» кредитны алдан түләү куркыныч та булырга мөмкин. «Әгәр компания коронавирус китереп чыгарган кризис йогынтысын җиңеп чыга алуына ышанмаса, акчаларны мөмкин булган кадәр озаграк вакытка сузарга кирәк», — ди Петропольский.
Банклар юридик затлар белән килешү төзегәндә, мәсәлән, лизинг кредитын, алдан түләп куйган өчен штраф турында да алдан ук язып куярга мөмкин, ди белгеч. Бу турыда «Челнинские известия» хәбәр итте.