Ковидтан үлгән ашыгыч ярдәм йөртүчесенең якыннарына 300 мең сум компенсация түлиләр
Николай Маренков коронавирусны эш урынында йоктырган.
Волгоград өлкәсендә ашыгыч ярдәм йөртүчесе, 58 яшьлек Николай Маренков коронавирустан үлгән, дип яза «Комсомольская правда».
Николай Волгоград өлкәсе Иловля шәһәре үзәк хастаханәсендә ашыгыч ярдәм йөртүчесе булып эшләгән. Анда шикәр диабеты да булганлыгы билгеле. Риск төркемендә булу сәбәпле, аны коронавируска даими тикшереп торганнар.
Коронавирус ачыкланганда әле анда авыру билгеләре булмый да. Әмма авыру, шикәр диабеты булу сәбәпле, бик тиз көчәя — Николайны хастаханәгә салалар, аннары реанимация бүлегенә күчерәләр. Озак та тормый, ул үлеп тә китә.
Николай — Волгоград өлкәсендә коронавирустан үлгән 33нче, ә хастаханә хезмәткәрләре арасында бишенче кеше. Табиблар һәм сәламәтлек саклау системасында эшләгән коронавирус корбаннарының исемнәре Хәтер исемлегенә кертелгән. Алар — 70 яшьлек Клавдия Максименко, 66 яшьлек Валентина Клаучек, 56 яшьлек Елена Пикавцова, 62 яшьлек машина йөртүче Сергей Меньшин.
Николайның вафатыннан соң якыннары хастаханәне судка бирә. Алар фикеренчә, хезмәткәргә коронавирустан сакланыр өчен тиешле шартлар тудырылмаган була. Ворошилов районы суды бу шартларның үтәлмәгәнлеген, Николайның эш урынында коронавирус йоктырганын таный, суд карары белән хастаханә аның якыннарына мораль зыян өчен түли. Хатыны, улы һәм әнисенә йөзәр мең сум акча — барлыгы 300 мең түләнгән.