Эльвира Хамматова шәхси тормышындагы күңелле үзгәрешләр белән уртаклашты. Җырчыга сөйгәне кияүгә чыгарга тәкъдим ясаган. «Котлаулар кабул итәм», – дигән Эльвира социаль челтәрләрдә.
Эльвираны тамашачы үз вакытында бик популяр булган «Яшьли сөйгән ярым» җырын башкаручы буларак белә. Җырчының беренче никахы уңышлы булмады. Ул бу турыда «Интертат»ка интервьюда сөйләгән иде. Эльвира Солтан исемле малай тәрбияли.
Сәхнәдәш һәм виртуаль дуслары җырчыны ихлас тәбрикли. «Нинди зур шатлык! Бәхетле, тигез гомер сезгә!», «Хатын-кыз бәхете телим. Сөеп-сөелеп яшәргә язсын», «Сез бик матур пар, бер-берегезгә охшагансыз. Бәхетле яшәгез», «Сез бу бәхеткә лаек, безнең изге күңелле Эльвирабыз», – дигән теләкләр язып калдырган алар.