Косметологка барганнан соң бер хатын сукырайган

Мәскәүдә бер хатын косметология процедурасы ясаганнан соң сукырайган. Россия Тикшерү комитеты җинаять эше ачкан. Бу турыда "Российская газета" хәбәр итте.

Вакыйга узган елның декабрь аенда була. 34 яшьлек хатын Яңа ел алдыннан косметологка бара. Ул стандарт процедуралар ясатмакчы була. Бер препарат инъекциясе ясатып, биттәге кимчелекләрен бетерергә ниятли. Ләкин уколдан соң бу хатынның күзләре күрми башлый һәм хастаханәгә мөрәҗәгать итә.

Тикшерүчеләр "Куркынычсызлык кагыйдәләренә туры килми торган хезмәтләр күрсәтү" маддәсе буенча җинаять эше ача. Шәхси клиника табиблары һәм җитәкчеләреннән сорау алалар.

Имгәнгән хатынны хастаханәдән чыгаруга ук медицина экспертизасы уздырачаклар, диелгән әлеге хәбәрдә.