Теләче районы Олы Кибәхуҗа авылында РСФСРның атказанган сәүдә хезмәткәре, Ленин орденнары кавалеры, милли татар аш-суын дөньяга таныткан Юныс Әхмәтҗановка багышланган беренче фестиваль-конкурс узды. Югары Кибәхуҗа авылыннан Гөләчәчәк Гинатуллина кош теле алып килгән.
Пешерү өчен: 6 йомырка, тоз, сода, ванилин, май, он, шикәр комы кирәк.
– Кош теле пешерү өчен 6 йомырка алам, 4 йомырканың сарысын аерып салам, калган 2 йомырканы ничек бар, шулай салам. Тоз, сода, ванилин кушам, он салып, камыр басам. Камырны сырлап кисәм, майга салып пешерәм. Майдан алгач, өстенә шикәр комы сибәм. Көнбагыш маенда пешкәч, кетердәп кенә тора. «Бисмилла»ны онытмасаң, бик тиз һәм җайлы була. Кабып алгач, эреп китә, әй тәмле дә инде! – ди хуҗабикә.