Коронавирустан вакцина ясаткан кешеләргә битлек киеп йөрергә кирәкме?
Прививка ясатканнан соң 3 атна дәвамында битлек киеп йөрергә, социаль дистанция сакларга кирәк.
«Спутник V» вакцинасының икенче компоненты белән прививка ясатканнан соң, өч атна дәвамында ковидка каршы саклык чараларын күрергә кирәк. Бу иммунитет формалашсын өчен мөһим. Бу хакта Гамалея исемендәге Эпидемиология һәм микробиология үзәге директоры Александр Гинцбургка сылтама белән РИА Новости яза.
«Вакцинация узган кешеләргә вакцинаның беренче һәм икенче компонентын ясаганнан соң, шулай ук икенче прививкадан соң өч атна дәвамында битлек кияргә, кулларны еш юарга, социаль дистанция сакларга, җәмәгать урыннарында йөрүдән тыелып торырга һәм җәмәгать транспортында йөрми торырга киңәш итәм», — диде белгеч.
Гинцбург сүзләренчә, бу организмга инфекция чыганагыннан саклану өчен кирәк һәм бу 60 яшьтән өлкәнрәкләр өчен аеруча әһәмиятле.