Коронавирустан терелгән 93 яшьлек әбине табиблар алкышлап озаткан — видео
Казахстанда коронавируслы хатын сау-сәламәт бала тудырган.
Казахстанда 93 яшьлек әби коронавирус белән авырып, терелгән. Аны хастаханәдән озату мизгелен видеога төшереп алганнар. Бу турыда Казахстан Сәламәтлек саклау министрлыгына сылтама белән РЕН ТВ хәбәр итте.
Видео кадрларында табибларның алкышлаганы күренә. Әбине махсус костюм кигән хезмәткәр озата бара, коридорның ике ягыннан да махсус киемле табиблар тезелешеп баскан. Алар алкышлыйлар. Әби таякка таянган, үз аяклары белән атлап бара.
Ведомство мәгълүматы буенча, әби Казахстан башкаласындагы картлар йортының берсендә яши. Ул 7 апрельдән бирле хастаханәдә яткан. Хәзер терелеп чыгып китеп бара.
Казахстанның Төркестан өлкәсендә яшәүче 74 яшьлек әби дә коронавирус белән авырып терелгән. Бу турыда «Казинформ» хәбәр итте.
«Сайрам районының Карабүләк авылында яшәүче хатын 1-17 апрельдә стационарда дәваланды. Хәзер ул тулысынча терелде», диелә хәбәрдә.
Алмата шәһәрендә COVID-19 белән авырый торган хатын сәламәт бала тапкан. 13 апрельдә йөклелегенең 39нчы атнасында аны хастаханәгә китерәләр. Коронавирус анализлары уңай нәтиҗә бирә. Хатынга кесарев кисеме ясыйлар. 3,5 кг авырлыктагы сау-сәламәт бала туа. Аңа тугач ук коронавируска анализ ясыйлар, тест тискәре нәтиҗә күрсәтә.
«Хатын COVID-19 авыруыннан дәвалангач, әнисе белән улын бергә хастаханәдән чыгарабыз», — дигән табиблар.