Коронавирустан прививка ясатыр алдыннан нәрсәләр ашарга ярамый?
Канда шикәр микъдары күп булса, вакцинациядән соң хәл китүе ихтимал, ди табиб.
Табиб-терапевт, гастроэнтеролог Никита Харлов коронавирустан прививка ясатыр алдыннан углеводлы ризыклар ашамый торырга киңәш итә. «Спутник» радиосына интервьюда ул шул хакта сөйли.
Бу продуктлар коронавирустан прививка ясаткач, хәлне җибәрергә мөмкин.
Вакцинация алдыннан аерым төрле иттереп әзерләнү таләп ителми. Ләкин ашауны көйләп тору хәерле. Прививкага кадәр һәм прививкадан соң артык ашамаска, яңа ризыклар кабып карамый торырга, аллерген продуктлардан баш тартырга кирәк.
Баллы ризык ашасаң, канда шикәр микъдары арта, кеше прививканы авыр уздыруы ихтимал. Бу бәрәңге, боткалар, ипи, җиләк-җимеш кебек углеводлы ризыкларга да кагыла. Канда шикәр микъдары азрак булган саен, прививканы кичерү җиңелрәк булачак, ди табиб.
Ул баллы ризыклар һәм тиз углеводларны чикләүне вакцинациядән соң ике атна дәвамында истә тотарга киңәш итте.