Коронавируска каршы прививка ясатканнан соң 41 яшьлек табиб кинәт үлгән
Ханымның ике баласы ятим калган.
Португалия табибы Соня Асеведо коронавируска каршы Pfizer прививкасы ясатканнан соң кисәк үлеп киткән дип яза РИА Новости.
Хатын-кыз табибка 41 яшь булган. Ул Порту шәһәрендә педиатр булып эшләгән. Ул 30 декабрьдә прививка ясата һәм 48 сәгатьтән соң, 1 гыйнварда кисәк үлеп китә. Аның ике баласы калган.
Табибның әтисе кызының бернинди авырулары булмавы хакында әйткән.
«Аңа COVID-19 авыруына каршы привика ясадылар, әмма аның бернинди симптомнары юк иде. Мин җавап көтәм. Кызымның ни сәбәпле үлүен белергә телим», — дигән ул.
Хатын-кызның ни сәбәпле үлүе белү өчен экспертиза ясала.
Моңа кадәр Швейцариянең Люцерн шәһәрендә бер ир коронавируска каршы прививикадан соң үлгән булган. Әмма 91 яшьлек ир бүтән чирләрдән үлгән дигән нәтиҗә ясалган.
АКШның Pfizer компаниясенең BNT162b2 препараты — коронавируска каршы кабул ителгән беренче прививка.