Коронавирус аркасында татар артистлары да концертларын күчерә
Бөтен дөньяда коронавирус пандемиясе игълан ителде.
Соңгы айларда бөтен Җир шарында коронавирус авыруы таралды. Татарстан Президенты Рөстәм Миңнеханов йөкләмәсе белән коронавирусның таралуына каршы көрәш буенча республика штабы тарафыннан 15 апрельгә кадәр махсус санитария-эпидемиология режимы кертү турында карар әзерләнде.
Зинира һәм Ризат Рамазановлар Түбән Камада булачак концертларын кичектереп тора. Бу турыда алар инстаграмдагы сәхифәләрендә хәбәр итте.
«Хөрмәтле тамашачыларыбыз. Кызганыч, ләкин Президентыбыз указы буенча, 15, 16 мартта Түбән Кама шәһәрендәге концерт кичектерелә. Тамаша 14, 15 майга күчерелә. Билетлар үз көчендә кала. Билетларыгызны тапшырмасагыз, сезгә рәхмәтле булырбыз. Без киләбез. Бездән тормаган әйберләр бар. Авырмыйк, сау-сәламәт булыйк», — дип сөйли алар.
Инстачылар бертавыштан артистларны юата, «кызганыч» дип язалар.
Дөньяда Covid-19 коронавирусы таралу пандемия рәвешен алды. Бу хакта РИА Новости Бөтендөнья сәламәтлек саклау оешмасы генераль директоры сүзләренә сылтама белән хәбәр итә.
«Якын көннәрдә һәм атналарда без үлем очраклары һәм авыру таралган илләр саны артачак дип фаразлыйбыз», — дигән Тедрос Адханом Гебрейесус Женевада узган брифингта.
Пандемия — ул илнең бөтен территориясендә, чиктәш дәүләтләр һәм дөньяның күп кенә илләре территориясендә йогышлы авыру таралу белән характерлана торган көчле эпидемия.