Коронавирус анализын көтеп ятучы ир-ат хастаханәдән качарга маташканда һәлак булган
52 яшьлек ир-атка хастаханә хезмәткәреннән авыру йоккан дип шикләнеп, изоляциягә күчерәләр.
Якутиядә яшәүче ир-ат хастаханәдә коронавируска анализларын көтеп ята. Ул ике тапкыр качып китәргә маташа, ләкин аны тоткарлыйлар. Аннары ул өченче тапкыр качарга җыенганда өенче катта урнашкан тәрәзәдән егылып төшеп, һәлак була. Бу турыда Вилюйск башлыгы Семен Винокуровка сылтама белән «Вести» каналы хәбәр итте.
Ир-ат ни сәбәпле шундый адымга барганы билгесез. Чөнки берничә сәгатьтән аны болай да өенә кайтарып җибәрергә тиеш булганнар. Ир-атның анализлары да әзер — анда коронавирус булмавы раслана.
Мәрхүмне бер атна элек Вилюйск хастаханәсенә китерәләр. Ул пычак белән яраланган була. Хастаханәдә ир-атның яраларын бер хатын бәйли. Соңрак бу хезмәткәрнең Петербургтан кайтуы һәм анда COVID-19 авыруы булуы ачыклана. Яралы ир-ат бу хатын-кыз белән аралашу сәбәпле, аны 16 апрельдә обсерваторга күчерәләр. Табиблар бу кешегә дә коронавирус йогу ихтимал дип шикләнә.
Дүрт көн изоляциядә яшәгән вакытта 52 яшьлек ир-ат ике тапкыр качарга маташа. Ләкин аны ике тапкырында да сакчылар тоткарлый. 21 апрельгә каршы төндә ул тагын качарга җыена: тәрәзә пәрдәләрен тоташтырып бәйли һәм аска төшә башлый. Ләкин ул егыла һәм һәлак була.