Яңа Чишмә районының абсолют батыры, «Манзара-2023» спорт премиясенә кандидат көрәшче Динар Гатиятов Фирдүс Тямаев белән бергә «Гомер үтә» җырын җырлаган. Бу хәл Фирдүснең концертында булган.
«Мин бу микрофон белән йорт алдым, машиналар алдым, бу – бик әйбәт микрофон», – дип, Фирдүс Динарга микрофон бирә. Динар җырлый башлагач, залга төшә дә: «Мин дә утырып карыйм әле», – дип, беренче рәттәге буш урынга утыра. Динар сәхнәнең иң алдына басып ук җырлый. Соңыннан алар кул бирешә, кочаклаша, көрәштәгечә итеп «стойка»га басалар.
Халык бу чыгышны көчле алкышлар, хуплау рухындагы кычкырулар, сызгырулар белән кабул иткән.
«Без – көрәшле Халык, без – көрәшче Халык, без – моңлы Халык! Лайк, лайк бу егеткә!» – дип язганнар «Манзара» премиясең «ВКонтакте»дагы битендә.
Көрәш җанатарлары да Динарның чыгышын уңай бәяләгән. «Динар, синнән җиңү көтеп калабыз! Фирдүсне дә алып килергә оныта күрмә үзең белән», «Молодец, супер чыккан», «Молодец, шәп булган! Миңа да җырларга кайтырсың әле», – дип язганнар көрәшчеләр.
Фирдүснең баһадир көрәшче белән дуэты ничек сезгә?