Башкортстанның Иглин районындагы Чуваш-Кобау авылында яшәүче ир-ат хаски этен көрәк белән чабып үтергән. Бу турыда «Башинформ» яза.
Эт вольерда яши, ләкин, ничектер, шуннан чыга һәм күршеләрнең ишегалдына керә. Хаски эте күршеләрнең тавыкларын ботарлый. Шуннан соң хуҗа этне көрәк белән бәреп үтерә.
Судмедэкспертиза күрсәткәнчә, эт күпләгән чапкаланган яралардан үлгән. Аны үтергән ир-ат гафу үтенми, үкенми һәм түләргә дә җыенмый. Эт хуҗасы исә билгеле блогер булып чыккан. Хаскины аңа 5 ел элек туган көненә бүләк иткән булганнар. Блогер кыз этен үтерүчене суд аша җәзага тарттырмакчы була.
«Честно говоря» тапшыруы редакциясенә этне үтергән ир-атның улы мөрәҗәгать иткән. Аның сүзләренчә, хаски аларның ишегалдына берничә тапкыр кереп, тавыкларны ботарлаган булган инде. Алар эт хуҗасын кисәткән, чара күрергә кушкан. Эт соңгы тапкыр кергәч 8 тавыкны ботарлаган, хуҗага да һөҗүм иткән. Шуннан соң ул кулына көрәк алырга мәҗбүр булган, диелә хәбәрдә.