Көньяк Сахалинскида 52 яшьлек хатын иреннән көнләшеп, аңа ацетон сипкән һәм ут төрткән. Бу хакта Россия Тикшерү комитетының Сахалин өлкәсе буенча тикшерү идарәсе телеграм-каналында хәбәр итәләр, дип яза «Рен ТВ» сайты.
«Шикләнелүче һәм аның тормыш иптәше өйдә булган, алар арасында көнчелек нигезендә конфликт чыккан. Шикләнелүче үз тормыш иптәшенә ацетон сипкән һәм «зажигалка» белән ут төрткән», – дип сөйлиләр ведомствода.
Ир-ат утны мөстәкыйль рәвештә сүндерә алган, шуннан соң «ашыгыч ярдәм» чакырткан. Көнче хатын тикшерүчеләргә бу төндә алкоголь кулланган булуын әйтә.
Хатын-кызга каршы «Үтерергә омтылу» маддәсе буенча җинаять эше кузгатылган.
