Комида пассажир самолеты шассисыз төшеп утырган
Пассажирларның барысы да исән сау.
UTair авиакомпаниясенең Мәскәү-Усинск рейсы буенча очкан самолеты аэропортка каты итеп төшеп утырган дип хәбәр итә РИА Новости. Җиргә төшеп утырганда самолет койрыгы белән бәрелгән.
Александра Нехорошева РЕН-ТВ телеканалына "башта ук нәрсәдер дөрес түгел иде", дигән. Көчле итеп җил искән, самолет корсагына төшеп утырган һәм каты итеп бәрелгән.
Самолет кар көртенә төртелеп туктаган. Керосин ага башлаган, кешеләрне чыгарып өлгергәннәр.
Пассажирларның берсе самолетның төшеп утырган мизгелен видеога төшереп алган.
"Шасси сынды, бозда шуып бардык", - дип сөйләгән Александр. Самолетның эчендәге җиһазлар вакылган. Пассажирларны тиз генә чыгарып өлгергәннәр. Урамда 20 градус салкын булган. Эвакуация вакытында кемнәрдәдер паника башланган, әмма ирләр: "Паникасыз гына, тыныч чыгабыз!" дип кычкыргач, кешеләр тынычланган.
Росавиациядә самолетның шассилары белән проблема булуын әйткәннәр. Бу вакыйганың сәбәпчесе көчле җил булуы да ихтимал дип кисәтәләр. Каза күрүчеләр юк, 94 пассажир да исән-сау, берсе генә тезен бәреп авырттырган.