Коллаген чыннан да җыерчыкларны бетерәме?

Медицина фәннәре кандидаты, табиб-диетолог, доцент Андрей Бобровский рекламаларда мактала торган коллагенның нәтиҗәлелеге турында аңлатма биргән. Бу турыда РИА Новости яза.

Коллаген — аксым ул, кеше организмында төрле функцияләр башкара, тән тиресенең эластиклыгын булдыра. Кремнар һәм биологик актив өстәмәләр (БАЗ) ясаучылар коллаген җыерчыкларны бетерә дип раслый. Кызганыч, аларны куллану нәтиҗә бирми, дип искәртә Бобровский.

Ул моның сәбәбен дә атый. Организм «тышкы коллагенны» үзләштерә алмый. Аны тышкы яктан кулланганда, ул «чит аксым» буларак бәяләнә, ди табиб.

«Иң популяр миф — кремнар яки тирегә сөртә торган башка чаралар составына керә торган коллаген җыерчыкларны бетерә. Монда гади бер әйберне аңларга кирәк: чит аксым эчкә узып керә алмый, аның үлчәме туры килми. Башкача әйткәндә, „тышкы“ коллаген беркайчан да „эчке“ коллаген булмый», — ди Бобровский.

Биологик актив өстәмәләр составындагы коллагеннан да әллә ниләр көтәргә кирәкми. Организм үзе тиешле күләмдә бу мөһим аксымны эшләп чыгарсын өчен тырышырга кирәк. «Эчке» коллаген чыннан да тән тиресен эластик итеп тота, ди табиб.

Моның өчен рационга кайбер ризыкларны кертергә кирәк. «Коллаген булдыру өчен С витамины эчегез, ул әлеге аксым синтезлануга ярдәм итә. Икенче киңәш — җиләк-җимеш желесы формасында желатин ашагыз, алар бик күп төрле. Холодец та бик файдалы. Хайван аксымнарының тән тиресе тонусына уңай йогынты ясавын истән чыгармагыз», — ди табиб.