Колагын тешләп өзгән өчен, Чаллы кешесе дустыннан 350 мең сум таләп итә
Хәзергә ул чәчен озын иттереп үстереп, колагын яшереп йөри.
Чаллыдагы 48 нче комплекста урнашкан бер йортта күрше подъездларда яшәүче 25 һәм 29 яшьлек ике ир-атның дуслыгы низаг белән тәмамлана. Алар салып, табын корып утырганда бәхәскә керә, аннары сугыша башлыйлар һәм үпкәләгән кунак — 25 яшьлек ир-ат — ишекне бәреп чыгып китә. Бу вакыйга турында «Челнинские известия» хәбәр итте.
Шуннан соң 25 яшьлек егет борчыла башлый һәм иптәше белән дуслашырга дип, кабат килә. Ул элеккеге иптәшен подъездга чакырып чыгара. Ләкин алар кабат талаша башлый, сугышканда ул дустының уң колак яфрагын тешләп өзә.
Колагы өзелгән 29 яшьлек ир-атны ашыгыч ярдәм белән хастаханәгә алып китәләр. Беренче ярдәм күрсәтсәләр дә, табиблар аның колагын элеккечә итеп саклап кала алмый.
Колакны тешләп өзүче ир-атның ике баласы бар. Аңа карата җинаять эше ачылган һәм 8 елга ирегеннән мәхрүм итүләре ихтимал.
Имгәнгән дус исә колагын озын чәче белән каплап йөри. Ул пластик операция ясатырга тели, моның өчен 350 мең сум акча кирәк. Ул элеккеге дустыннан шундый сумма таләп итмәкче була. Әлеге бәхәскә ноктаны суд куячак, диелә бу хәбәрдә.