Татарстанның Питрәч районы суды 27 яшьлек ир-атны 2 айга сак астына алу турында карар чыгарды. Ул әнисен үтергән, дип шикләнәләр. Бу турыда «Татар-информ» Татарстан прокурорының өлкән ярдәмчесе Руслан Галиевка сылтама белән хәбәр итте.
Фаҗига узган якшәмбе булды. Көек авылындагы «Светлый» торак комплексындагы хәл турында социаль челтәрләрдә яздылар. Биредә 27 яшьлек ир-ат 57 яшьлек анасына берничә тапкыр пычак кадый. Хатын-кыз урында ук һәлак була.
Соңрак ир-атны сак астына алалар. Агентлыкка билгеле булганча, бу кеше психоневрология диспансерында хисапта торган.
Хәзер аны 25 апрельгә кадәр сак астына алганнар, диелә бу хәбәрдә.
