Казанда яшәүче бишенче разрядлы кондитер-технолог Зөлфия Идрисовадан киви пирогы рецептын тәкъдим итәбез.
Камыр өчен: 0,5 литр сөт, 0,8-1 кг он, 200 грамм атланмай, 2 йомырка, 2 аш кашыгы шикәр комы, 0,5 бал кашыгы тоз, 50 грамм «Люкс» чүпрәсе.
Бу камыр 4-5 пирогка җитә.
Эчлек өчен: 500 грамм киви, 300 грамм шикәр комы, 100 мл су
Камырны әзерләргә һәм 20-30 минут ял иттерергә.
Кивины турарга, блендер белән вакларга, шикәр комы, су салырга. Катнашманы кайнатып чыгарырга һәм сүрән утта 10-20 минут тотарга. Болгатырга һәм күбеген алырга онытмагыз.
2 аш кашыгы лимон согы салырга һәм тагын биш минут кайнатырга.
Пирог ясарга һәм 180 градуска кадәр кызган духовкага 25-35 минутка куярга.