Шоумен, алып баручы Зөлфәт Зиннуров социаль челтәрдәге сәхифәсендә 15 балалы гаилә белән таныштырды. Ул өченче бала Рамилнең туган көн мәҗлесен үткәргән.
«Балтач районы Пыжмара авылында яшәүче Алсу һәм Хәбир Мөхәрләмовлар 15 бала тәрбияләп үстергән. Бүгенге көндә 15 оныклары бар, пенсияләре генә җитсен», – дип язган ул.
Әлеге гаиләдә 9 малай һәм 6 кыз! Иң олысына – 37 яшь, иң кеченә – 14 яшь.
«10000 тапкыр карадым. Ышанып булмый. Күз тимәсен»;
«Ай-яй, тулы матур гаилә. Нәсел җебегез корычтан»;
«Сөбханалла, сокланырлык»;
«Бик яхшы гаилә. Балалары бик уңганнар, бер эштән курыкмыйлар. Кечкенәдән эш белеп үскән балалар. Кыр корабларын иярләгән батыр егетләр алар. Горурланмый мөмкин түгел» – дип сокланган халык.
Әлбәттә, күпчелекне аларның барысы да үз балалары булу-булмавы кызыксындыра. Гаиләнең танышлары бу сорауга «әйе» дип җавап биргән.