Кишер һәм кара җиләк ашап күзне яхшыртып буламы?
Кишерне көн саен килолап ашасаң да, организм тәүлеклек норманы гына үзләштерә, калганы эчәктән чыгып китә.
Кишер һәм кара җиләктә (черника) файдалы матдәләр күп. Тик аларны күп итеп ашап кына күз күремен яхшыртып булмый. Организм витаминнар һәм файдалы микроэлементларны запаска туплап куя алмый. Бу турыда табиб-офтальмолог Вячеслав Куренков «Спутник» радиосына интервьюда сөйләгән.
Кишер һәм кара җиләк ашап күз күремен яхшыртып була дигән сүз — миф, ди ул.
«Килолап кишер, кара җиләк ашарга кирәкми, моның файдасы юк. Бу матдәләрнең бер тәүлектә үзләштерелә торган нормасы бар. Килолап кишер ашагач, бер кило кишер үзләштерелә дигән сүз түгел. Организм үзенә кирәк кадәр генә ала. Мәсәлән, бу тәүлегенә 15 микрограмм булса, калганы ашкайнату тракты аша кире чыгарылачак», — ди белгеч.
Күзләр сәламәт булсын өчен дөрес тукланырга, ял һәм эш вакытын чиратлаштырырга, саф һавада физкультура белән шөгыльләнергә, елына кимендә бер тапкыр офтальмологта тикшеренергә кирәк, диелә хәбәрдә.