Кисәтү: «онлай-бәйгедә туганым өчен тавыш бир әле» дигән үтенечкә җавап бирү куркыныч!
Татарстан буенча Эчке эшләр министрлыгы телеграм-каналында «онлайн-бәйгедә тавыш бир әле» дигән үтенечләрне мошенниклар җибәрергә мөмкин булуы турында кисәтәләр.
«Минем сеңлем өчен тавыш бир әле, зинһар!» – мошенниклардан шундый үтенечләрне Татарстан кешеләренә җибәрә башлаганнар.
Сылтама буенча күчеп, тавыш бирүдә катнашкач, сез интернетта хисап язмаларындагы шәхси мәгълүматыгызны югалтырга мөмкин!
Чистайда яшәүче хатын-кыз полициягә мөрәҗәгать иткән. Ул кызының мессенджерына фотография өчен тавыш бирергә сылтама килүен сөйли. Кызы сылтама буенча керә, мошенниклар аның телефоныннан хисап язмасы белешмәсен урлый, бер банктагы шәхси кабинетына керә һәм үз хисапларына 44 мең сум акча күчерәләр.
Җинаять эше ачылган.
Хокук саклаучылар иминлек кагыйдәләрен истә тотарга, сак булырга чакыра. Таныш булмаган сылтама аша күчмәгез, хәтта танышыгыздан килсә дә. Хәбәр җибәргән кешегә шалтыратып белешегез, диелә хәбәрдә.